Кара-Көлдө "11 жашар окуучу кызды жип менен муунтуп өлтүргөн" деп кармалган адам буга чейин 6 жолу соттолгону аныкталды

Жалал-Абад облусунун Кара-Көл шаарында "музыкалык окуу жайынан үйүнө бараткан 11 жашар кызды сейил багында жип менен муунтуп өлтүргөн" деп шектелген 35 жаштагы адам буга чейин 6 жолу соттолгон. Бул тууралуу бүгүн, 26-сентябрда SUPER.KG'ге Жалал-Абад ОИИБинен маалымдашты.

"Кылмышка шектүү адам 1980-жылы туулган Токтогул районунун Торкен айылынын тургуну экени анык болду. Ал буга чейин "уурдоо", "башкага берүү максатын көздөбөстөн, баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү" беренелери боюнча соттолуп, камакта отурган. Бир апта мурун ал түрмөдөн чыккан экен. Тергөөчүлөр аймактагы күрөөканалардын биринен маркумга таандык алтын сөйкөнү табышкан. Мындан тышкары жергиликтүү ашканалардын биринен кыздын уюлдук телефону табылган. Кылмышка шектүү адам сөйкөнү 600 сомго, телефонду 400 сомго саткан экен",- дешти облустук милициядан.

Айта кетсек, кечээ, 25-сентябрда саат 15:20 чамасында Кара-Көл шаардык сейил багынын күн чыгыш тарабынан 2004-жылы туулган кыздын жансыз денеси табылган. Ата-энесинин берген маалыматы боюнча, ал саат 9:00дө Кара-Көл шаардык музыкалык окуу жайына сабакка кеткен, колунда комузу болгон. Ал жарым сааттан кийин келиши керек болчу, бирок үйгө келген эмес. Анын жансыз денеси табылган жерден комузу табылган жок.

Бул факт боюнча “адам өлтүрүү” беренесинин негизинде кылмыш иши козголгон. Жалал-Абад ОИИБинин тажрыйбалуу кызматкерлеринен ыкчам топ түзүлүп, кылмыштын изи сууй электе кылмышка шектүү жаран кармалган. Учурда соттук-медициналык экспертизалар жүргүзүлүүдө.