Өкмөт башчы Кара-Көлдөгү 11 жашар окуучу кыздын өлүмү боюнча ишти өзгөчө көзөмөлгө алууну тапшырды

Бүгүн, 28-сентябрда өкмөт башчы Темир Сариев вице-премьер-министр Абдырахман Маматалиевге 25-сентябрь күнү Кара-Көл шаарында киши колдуу болуп көз жумган 11 жашар кыздын өлүмү боюнча тергөө иштерин өзгөчө көзөмөлгө алууну тапшырды. Өкмөттүк аппараттан билдиришкендей, Сариев Маматалиевге кыздын өлүмүнө шектүү жаран буга чейин 6 ирет соттолуп, төрт жыл мурун камалып, бирок чыгып кеткендигинин себебин да иликтөө тапшырмасын койду.

Айта кетсек, 25-сентябрда саат 15:20 чамасында Кара-Көл шаардык сейил багынын күн чыгыш тарабынан 2004-жылы туулган кыздын жансыз денеси табылган. Ата-энесинин берген маалыматы боюнча, ал саат 9:00дө Кара-Көл шаардык музыкалык окуу жайына сабакка кеткен экен. 

Бул факт боюнча “адам өлтүрүү” беренесинин негизинде кылмыш иши козголуп, Жалал-Абад ОИИБинин кызматкерлери тарабынан кылмышка шектүү адам кармалып, ал 1980-жылы туулган Токтогул районунун Торкен айылынын тургуну экени анык болду. Ал буга чейин "уурдоо", "башкага берүү максатын көздөбөстөн, баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү" беренелери боюнча соттолуп, камакта отурган. Бир апта мурун ал түрмөдөн чыккан экен. Тергөөчүлөр аймактагы күрөөканалардын биринен маркумга таандык алтын сөйкөнү табышкан. Мындан тышкары жергиликтүү ашканалардын биринен кыздын уюлдук телефону табылган. Кылмышка шектүү адам сөйкөнү 600 сомго, телефонду 400 сомго саткан экен. Учурда соттук-медициналык экспертизалар жүргүзүлүүдө.