Данияр Аттокуров: "СДПК Ысык-Көлгө 5 лыжа базасын ачууну пландап жатат"

Жогорку Кеңештин депутаттыгына СДПКдан талапкер Данияр Аттокуров Жети-Өгүз районундагы Кызыл-Суу айылынын тургундары менен жолугушуу өткөрдү. Партиянын маалымат кызматынын билдиришинче, жолугушууда талапкер партиянын аткарган иштери тууралуу маалымат берип, элди СДПКнын саясий платформасы менен тааныштырды. 

Аттокуров туристтик тармактын кирешеси акыркы 5 жылда 2 эсе: 8 миллиард сомдон 19 миллиард сомго, шаарлардын жана айылдардын бюджети 940 миллион сомдон 1 миллиард 433 миллион сомго өскөнүн, облуста 38 мектеп курулуп, жолдорду оңдоо боюнча көптөгөн иштер жасалганын белгиледи. 

"Партиянын алдыдагы 5 жылга карата планында Ысык-Көл облусундагы курорттук аймактардын суу тазалоочу курулмаларын жаңылоо иштери каралган. Кийинки жылы Кызыл-Суу жана Дархан айылдарында суу түтүктөрүн жаңылоо иштери башталат, каржы булактары табылган",- деди Аттокуров. 

Талапкер тоо-лыжа тармагын өнүктүрүү боюнча партиянын долбоору Ысык-Көлдүн туризмин өнүктүрүүгө жаңы импульс берерин айтат. "Беш айга созулган кышкы туризмди өнүктүрүү жаңы иш орундарын түзүүгө мүмкүндүк берет, салык кирешелерин көбөйтөт. Инвестиция тартуу менен Ысык-Көл аймагына 5 тоо лыжа базасын ачууну пландап жатабыз",- дейт Аттокуров.