"Өнүгүү-Прогресс" оң рулдуу унааларга тыюу салуу менен 50 000 адамдын жумушсуз калышына каршы

Оң рулдуу унаалар өлкө үчүн баш ооруткан көйгөйлөрдүн бири болуп калды. Баасы арзан болгондуктан, чексиз санда мамлекетке алынып келип жаткан оң рулдуу унаалар өкмөт менен калктын ортосунда талаш маселеге айланганын "Өнүгүү-Прогресс" партиясынын маалымат кызматы кабарлады. Өкмөттүн кабыл алган токтомуна ылайык, 2016-жылдын 1-январынан тартып оң рулдуу унааларга тыюу салынары айтылды.

“Өнүгүү-Прогресс” партиясынын төрагасы Бакыт Төрөбаев мындай чечимди туура эмес деп эсептей турганы, каатчылык болуп жаткан мезгилде мамлекет өз жарандары менен мындайга барбашы керектиги айтылат маалыматта. “Биздин өкмөт жаңы жумуш орундарын түзүп берүүнүн ордуна, тескерисинче, жумушсуздардын санын көбөйтүп жатат. Ак пейили менен иштеп жаткан таксисттер буга окшогон мыйзамдардын айынан жумушсуз калбашы керек. Кеп рулдун кайсы жагында орун алгандыгында эмес, жол коопсуздугун сактоо эрежелеринде. Ошондуктан биз буга кайдыгер карабашыбыз керек”,- деп билдирди Бакыт Төрөбаев. “Өнүгүү-Прогресс” партиясы оң рулдуу таксилерге уруксат берүүчү жалгыз гана партия экени, ИИМдин маалыматы боюнча, өлкөдөгү оң рулдуу унаалардын саны 200 миңге жакын же мамлекеттеги жеңил унаалардын 35 пайызын түзөрү айтылды.

№8 – “Өнүгүү-Прогресс” саясий партиясынын катар номери.