Футбол федерациясы Тажикстанга каршы оюнга эрте келүүнү суранды, стадиондун эшиктери 3 саат мурун ачылат

Футбол боюнча Дүйнө чемпиондугунун тандоо турунда орун алчу Кыргыз Республикасы жана Тажикстан беттешине даярдыктар кызуу көрүлүүдө. Бардык коюлган пландар 8-октябрга карата бүткөрүлөт. Бул тууралуу КРнын Футбол федерациясынын вице-президенти Асылбек Кадралиев маалымат жыйынында билдирди.
“Беттешке күйөрмандардын эрте келүүсүн суранабыз. Бул жолу Австралияга каршы беттеште кетирилген каталар эске алынып, бир топ чаралар көрүлдү. Күйөрмандар кире турган эшиктердин саны көбөйтүлдү. Эшиктер беттешке 3 саат калганда ачылат, ошол себептүү мурункудай көрүнүштөрдүн алдын алабыз деп ойлойм”,- деди А.Кадралиев.
Кошумчалай кетсек, кыргыз футболчулары тандоо турунда Тажикстан менен 8-октябрда беттешет. Беттешке 19:30да старт берилери күтүлүүдө.