Калыс-Ордодо "агасынын үйүнө конок болуп барып, аны өлүмгө жеткиргенге чейин токмоктогон" деп шектелген жаран кармалды

Калыс-Ордо конушунда "агасынын үйүнө конок болуп барып, аны өлүмгө жеткиргенге чейин токмоктогон" деп шектелген жаран кармалды. Бул тууралуу бүгүн, 7-октябрда Бишкек ШИИББинин басма сөз кызматы билдирди.
Маалыматка ылайык, 2015-жылдын 30-сентябрында ооруканага эс-учу жок абалында 33-35 жаштардагы адам жеткирилип, ага "баш сөөк жаракаты" деген диагноз коюлган. 1-октябрда ал эсине келбей каза тапкан. Ал Жалал-Абад облусундагы Токтогул районунун 33 жаштагы Н.Б. аттуу тургуну экени аныкталган.
"Бул факт боюнча "ден соолукка атайылап оор залал келтирүү, байкабастыктан жабырлануучуну өлүмгө жеткирүү" беренесинин негизинде кылмыш иши козголгон. Тергөө амалдарынын жыйынтыгында төмөнкү маалыматтар белгилүү болгон: 30-сентябрда жабырлануучунун үйүнө иниси келген. Алар алкоголдук ичимдик ичишип, ортодон уруш чыгып, мушташууга чейин жеткен. Мындан улам үй ээсинин ден соолугуна оор залал келтирилген.
Ыкчам иликтөө тобу бул кылмышка шектүү катары Жалал-Абад облусунун Токтогул районунун 30-жаштагы Н.З. аттуу тургунун кармашты. Соттун чечими менен ал №1-СИЗОго отургузулду. Учурда тергөө уланууда",- деп маалымдайт Бишкек ШИИББи.