Криштиану Роналду Европадагы лигаларда мыкты бомбардир катары 4-ирет “Алтын бутсага” ээ болот

Эртең, 13-октябрда испаниялык “Реал” футболдук клубунун чабуулчусу Криштиану Роналду Европанын ири лигаларында мыкты бомбардир футболчуга ыйгарылуучу “Алтын бутса” сыйлыгын алат. Бул сыйлык Роналдуга акыркы сезондогу жыйынтыгы үчүн тапшырылат. Чет элдик маалымат булактары кабарлагандай, өткөн сезондо ал Испания чемпиондугунда 35 оюнда 48 гол киргизген.

Белгилей кетсек, муну менен португалиялык футболчу карьерасында “Алтын бутсаны” 4-ирет алмакчы (буга чейин 2008-жылы, 2011-жылы, 2014-жылы алган). Бул 1968-жылдан бери жыл сайын тапшырылып келген сыйлыктын тарыхында жаңы рекорд болмокчу. 

Кошумчалай кетсек, бул сыйлык Европанын лигаларында эң көп гол киргизген футболчуларга берилет. Сыйлык ээсин аныктоодо Англия, Германия, Испания жана Италиянын лигаларында киргизилген ар бир гол 2 упай болуп эсептелинет. Ал эми башка лигаларда катталган голдор 1,5 упайга тете. Роналду бул жолу 96 упай топтогон.