Коргоо министри Абибилла Кудайбердиевге кылмыш иши козголду

УКМКнын Коррупцияга каршы күрөшүү кызматы Аскер прократурасы менен биргеликте жүргүзгөн текшерүүлөрдүн натыйжасында Коргоо министрлигинде бюджеттик каражаттарды пайдалануудагы коррупциялык схемаларды аныктады. Бул тууралуу мекеменин басма сөз кызматы 12-октябрда билдирди.

Маалыматка караганда, 2014-жылдын август айында "Аскер курулуш" мамлекеттик ишканасынын башкы директору К.К., Коргоо министрлигинин Каржы башкармалыгынын башчысы Ш.М. жана коргоо министринин орун басары Н.Ж. даярдаган документтерге ылайык, коргоо министри А.Кнын буйругу менен "Аскер курулушу" ишканасына министрликтин атайын каражаттарынын эсебинен 12 миллион сом акча насыя катары 2 жылга мыйзамсыз берилген. Көрсөтүлгөн акча каражатынан 2 миллион сом "Ояма", 3 миллион сом "Айти-Булак", 7 миллион сом "ЖКХ Коммунальщик сервис" ишканаларынын эсебине которулганы аныкталган. Жогорудагы ишканалардын "Аскер курулуш" ишканасына болгон дебитордук карызы 58 миллион 618 миң сом экени жана фирмалардын директорлору "Аскер курулушта" айдоочу, цехтин мастери, сантехник болуп иштеп келишкени белгилүү болгон.

12-октябрда коргоо министри Абибилла Кудайбердиев, министрликтин жооптуу кызматкерлери, "Аскер курулуш" ишканасынын жумушчуларына кылмыш иши козголду.