БШК Адахан Мадумаров ишенбей жаткан участкаларда добуштарды кайра санап чыгууну чечти

Борбордук шайлоо комиссиясы 12-октябрда парламенттик шайлоодон кийин талаш жараткан участкаларда добуштарды кайра санап чыгууну чечти. БШКнын билдиришинче, Ош шаарындагы №5299, 5317, Араван районундагы №5358, 5359, 5481-шайлоо участкаларында добуштар экинчи жолу эсептелип чыгат. Аталган участкаларда добуштарды электрондук эсептөөнүн жыйынтыгы кол менен саналган добуштарга дал келбей жатканын шайлоого катышып өтпөй калган "Бүтүн Кыргызстан - Эмгек" партиясы айтып чыккан эле. Бул боюнча партиянын өкүлдөрү БШКга арыз жазышып, шек жараткан участкалардагы шайлоонун жыйынтыгын тааныбоо керектигин билдиришкен. Алар добуштардын айырмачылыгы 37 миң болуп жатканын айтышкан.