Футболчу Криштиану Роналду мыкты бомбардир катары "Алтын бутса" сыйлыгын 4-ирет алып, рекорд койду

Кечээ, 13-октябрда испаниялык “Реал” футболдук клубунун португалиялык чабуулчусу Криштиану Роналду Европанын ири лигаларында мыкты бомбардир футболчуга ыйгарылуучу “Алтын бутса” сыйлыгын алды. Бул сыйлык Роналдуга акыркы сезондо Европадагы лигалардын бомбардирлеринин алдынкы сабына чыкканы үчүн тапшырылды. Ал өткөн сезондо Испания чемпиондугунда 35 оюнда 48 гол киргизген.

Белгилей кетсек, муну менен португалиялык футболчу карьерасында “Алтын бутсаны” 4-ирет алып, жаңы рекорд койду (буга чейин 2008-жылы, 2011-жылы, 2014-жылы алган).  

Кошумчалай кетсек, бул сыйлык Европанын лигаларында эң көп гол киргизген футболчуларга берилет. Сыйлык ээсин аныктоодо Англия, Германия, Испания жана Италиянын лигаларында киргизилген ар бир гол 2 упай болуп эсептелинет. Ал эми башка лигаларда катталган голдор 1,5 упайга тете. Роналду бул жолу 96 упай топтогон.