"Республика - Ата Журт" партиясы жасалма документ тууралуу айтып чыккан талапкерин сот жообуна тарттырганы жатат

"Республика - Ата Журт" партиясы "мандаттан баш тартууга арыз жазган эмесмин, жасалма арыз жазышып, бирөөлөр кол коюшкан" деп ИИМге кайрылган партия талапкери Аида Исмаилова боюнча билдирүү жасады. Партия аталган талапкер өз каалоосу менен депутаттыктан баш тартып арыз жазганын айтууда. Бул боюнча "Республика - Ата Журт" такталбаган жалган маалыматтар боюнча кылмыш иши мыйзамсыз козголгонун билдирип ИИМ менен Башкы прокуратурага тосмо арыз жазды. Ал эми "жалган маалымат таратуу менен моралдык зыян келтирди" деп партия аталган талапкерди 10 миллион сом төлөтүүнү көздөөдө. 

"Республика - Ата Журт" далил катары Аида Исмаилованын ант бергендеги видеосун, анттын тексти жазылган кагазга койгон колун жана жазган арызын көрсөтүп жатат. Анда талапкер шайлоодо жетиштүү добуш ала албаса, тизмеден чыгууга даяр экенин билдиргени белгиленет. 

"Аида Исмаилова өз округунан эң төмөнкү өлчөмдө да добуш топтой алган жок. Мындай шартта аталган маселе боюнча бардык арыздар негизсиз жана партиянын репутациясына зыян тийгизет деп эсептелет",- деп айтылат маалыматта.