Коркмазов сотто "Нарымбаев менден көрсөтмөнү өзгөртүүнү талап кылууда" деди

Бүгүн, 19-октябрда Бишкек шаарынын Биринчи Май райондук сотунда коррупция боюнча айыпталган президенттик аппараттын мурунку башчысы Данияр Нарымбаев жана Жогорку Кеңештин экс-депутаты Хажимурат Коркмазовдун иши боюнча соттук отурум өтүп жатат. Сот залында Коркмазов жаңы жагдайды ачыкка чыгарды. Анын билдиришинче, Нарымбаев тарабынан көрсөтмөнү өзгөртүү талабы коюлуп жатат. "Мен буга чейин эч кандай унчукпай келгем, бирок бир нерсени бүгүн ачыкка чыгарып коюуну чечтим. Буга чейин бир аз күн мурун Нарымбаев мага көрсөтмөнү өзгөртүү талабын коюп, жактоочусун жибериптир, бирок мен башында кандай көрсөтмө берсем, ошол бойдон калат",- деди Коркмазов.

Эскерте кетсек, Коркмазов 2015-жылдын 15-июлунда Бишкектин мурунку мэри Нариман Түлеевдин кызынан 100 миң доллар пара алып жатканда кармалган. Кылмыш үстүнөн кармалган депутат тергөө учурунда бул ишке президенттик аппараттын мурунку башчысы Д.Нарымбаевдин катышы бар экенин билдирген. 22-июлда Нарымбаевге айып тагылып, УКМКнын СИЗОсуна убактылуу камакка алынган. Прокуратура жүргүзгөн тергөөнүн жыйынтыгында Данияр Нарымбаевге “пара алуу”, “кызмат абалынан кыянаттык менен пайдалануу”, ал эми Хажимурат Коркмазовго “пара алуу” беренеси боюнча айып тагылган.