Сүлүктүдөгү шахтада 3 адам газга ууланып каза тапты, 2 адам ооруканага жеткирилди

Баткен облусунун Сүлүктү шаарында шахтада 3 адам каза таап, 2 адам ооруканага жеткирилди. Бул тууралуу ӨКМнын басма сөз кызматынан кабарлашты.

Маалыматка ылайык, окуя 20-октябрда болжол менен саат 16:20да катталган. Бул шахтаны “Матазим” ишканасы иштетип келген. Жабыр тарткандарды башка шахтёрлор алып чыгышкан. Туура 2 саат 20 мүнөт өткөн соң ӨКМнын кызматкерлери бул жерде болуп, газдын деңгээлин текшеришкен.

Жабыр тарткандар Сүлүктү шаардык ооруканасына жеткирилсе, каза тапкандардын сөөктөрү өлүк сактоочу жайга жеткирилди. Мекеме соттук-медициналык экспертиза дайындалганын кошумчалайт.

Каза тапкандар:

1. Хамидов Камалжон Халикович, 1985-жылы туулган;

2. Разыков Ганижон Давранович, 1995-жылы туулган;

3. Сулайманов Шокир Сулайманович, 1983-жылы туулган.

Жабыр тартып, ооруканага жеткирилгендер:

1. Сангинов Халилжон Халикович, 1989-жылы туулган;

2. Сангинов Жамалидин Жоликович, 1988-жылы туулган.