"Республика-Ата Журт" партиясынан депутаттыкка талапкерлер тизмеден чыгуу боюнча арызды августта жазышканы айтылды

Бүгүн, 22-октябрда Жогорку Сотто "Республика-Ата Журт" партиясынан депутаттыкка талапкер Аида Исмаилованын атынан мандаттан баш тартуу тууралуу жасалма арыз боюнча соттук отурум өтүүдө.

Соттук отурумдун жүрүшүндө "Республика-Ата Журт" партиясынын өкүлү тизмеден чыгуу боюнча талапкерлердин арызын БШКга алып баргандыгын айтты. "Арызды талапкерлер өздөрү жазышкан. Партия менен талапкердин ортосунда өз ара келишимге ылайык, талапкерлер тизмеге кирүү үчүн кээ бир жерлерди аныктап алуу керек эле. Келишимде партиянын программасын жеткирүү керектиги каралган",- деди.

Сот: "Өз ара келишим" дегенде жетиштүү добуш топтоону айтып жатасызбы?"- деди. Ошондой эле ал арыз качан жазылгандыгын сурады.

Партиянын өкүлү А.Исмаилова шайлоодо жетиштүү добуш топтой албагандыгын кошумчалап: "Талапкерлер тизмеден чыгуу боюнча арызды партиянын съездине чейин, август айында жазышкан. Ага ылайык, алар шайлоодо жетиштүү добуш албаса тизмеден чыгарылмак",- деди.