УКМК: Бишкекте укук коргоо органдарынын имаратында жардырууну пландаган террордук топтун мүчөсү кармалды

15-октябрда УКМКнын кызматкерлери тарабынан уюштурулган антитеррордук иш-чаранын жүрүшүндө террордук топтордун биринин активдүү мүчөсү колго түшүрүлгөн. Бул тууралуу аталган мекеменин басма сөз кызматынан кабарлашты.

Маалыматка ылайык, кармалган жаран жакын арада укук коргоо органдарынын имаратында бир катар жардырууларды пландаган. Тинтүү маалында колго жасалган жарылуучу заттар, майдаланган күкүрттөр, боолор, кислота, уюлдук телефон жана башка каражаттар табылган.

Буга катар жардырууну пландаган имараттардын схемасы, жардырууну уюштуруу боюнча көрсөтмөлөр, диний адабияттар (дисктер жана китептер), элди жихадга чакырган кол жазмалар табылган. Тергөө иштеринин жүрүшүндө кармалган жаран террордук уюмга мүчө экенин жана имараттардын бирин жардыруу боюнча буйрук алганын моюнга алган. Ошондой эле анын шериги да кармалды. Учурда иликтөө иштери жүрүп жатат.