Льюис Хэмилтон 3-ирет “Формула-1” жарышында Дүйнө чемпиону болду

Британиялык спортчу Льюис Хэмилтон “Мерседес” командасынын курамында карьерасында 3-ирет Дүйнө чемпиону аталды. Ал чечүүчү жарышта АКШнын Гран-присин утуп, мөөнөтүнөн мурун чемпион аталды. Бул тууралуу чет элдик маалымат булактары кабарлайт.

Маалыматка ылайык, АКШдагы жарышта ал мара сызыгын биринчи болуп кесип өтсө, 2-орунду Нико Росберг (“Мерседес”) ээледи. Себастьян Феттель (“Феррари”) жарышты 3-орунда жыйынтыктады. Муну менен Хэмилтон сезондогу упайларынын санын 327ге жеткирди (чемпиондуктагы атаандаштары Феттелде 251 упай, Нико Росбергде 247 упай).

Кошумчалай кетсек, Л.Хэмилтон “Формула-1деги” карьерасын 2007-жылы “McLaren” командасында баштап, кийинки жылы эле Дүйнө чемпиону аталган. Акыркы эки жылдан бери ал “Мерседестин” намысын талашып келет. Эсиңиздерде болсо, ал өткөн жылы Дүйнө да чемпиону аталган.