Жаңы конуштардан келген өспүрүмдөрдүн футболдук мелдешинде №43-мектептин кыздары жеңүүчү аталышты (фоторепортаж)

24-октябрда Футбол федерациясына караштуу Футбол борборунда жаңы конуштардагы мектеп окуучуларынын арасында футболдук мелдеш болду. Анда 8 жаңы конуштан келген кыздар жана балдар арасында жеңүүчүлөр аныкталды.

Уюштуруучулар SUPER.KG порталына кабарлашкандай, “Күн сайын бактылуу болуу” деген аталыштагы мелдешке 8 мектептин (№8, 21, 43, 46, 57, 81, 86, 87) кыздар жана балдар командалары катышты. Ошондой эле Балдарды коргоо борборунан жана өнөктөштөрдүн балдарынан куралган командалар да өз күчтөрүн сынашты.

Бул күнү кыздардын оюну балдардын оюнуна салыштырмалуу элдин көңүлүн көбүрөөк өзүнө бурду. Кызыктуу оюндардын жыйынтыгында кыздар арасында №43-мектептин кыздары кубокко ээ болушту. 2-орунду №8-мектептин окуучулары алышса, 3-орун №87-мектептин энчисине жазылды.

Балдар арасында 1-орунду №57-мектептин окуучулары жеңип алышты. Кийинки 2 байгелүү орунду №87-мектептин жана №8-мектептин окуучулары багындырышты.

Кошумчалай кетсек, мелдешке 13 жаштан 16 жашка чейинки курактагы балдар жана кыздар катышты. Саамалык коомдогу көйгөйлөргө элдин көңүлүн буруу, балдарды түрдүү кордуктардан сактоого чакыруу максатында уюштурулду. Уюштуруу иштерин Балдарды коргоо борбору даниялык уюм менен биргеликте аткарган.