Жылнаама, 27-октябрь: Мындан 33 жыл мурун ырчы Клара Алибекова туулган

* Мындан 33 жыл мурун, 1982-жылы ырчы Клара Алибекова Жалал-Абаддын Көк-Жаңгак шаарчасында төрөлгөн. 5-классында “Кыргызымдын жигиттери” аттуу ырды аткарып чыгып белгилүү болгон. Андан кийин “Классташым”, “Энекем”, “Сүйүү керемети” деген ырларды аткарган.

* Мындан 287 жыл мурун, 1728-жылы англиялык деңиз саякатчы Жеймс Кук туулуп, 1779-жылы 14-февралда 50 жашында каза болгон.
Ал Жер шарын айланып чыккан 3 экспедицияга жетекчилик кылган. Тынч океандагы 11 архипелагды жана 27 аралды ачкан. Кук уюл жакта материк же ири кургактык бар экенин божомолдогон, бирок аны издөөнү токтотууга аргасыз болгон. Үчүнчү экспедициясында (1776-1779) Гавайи аралына жетип, Американын түндүк-батыш жээгин изилдеген. Кук Гавайи аралындагы жергиликтүү калк менен болгон кагылышта курман болгон.
Жаңы Зеландиянын Түштүк аралындагы тоо, Тынч океандагы аралдар тобу (Кук архипелагы), Жаңы Зеландиядагы Түштүк жана Түндүк аралын бөлүп турган кысык, Алясканын жээгиндеги булуң Куктун ысымынан аталган.

* Мындан 37 жыл мурун, 1978-жылы англиялык скрипкачы, композитор Ванесса Мэй Сингапурда туулган. Толук аты-жөнү – Ванесса Мэй Ванакорн Николсон. Ванесса 9 жашында жеке концертин берип, миңдеген көрүүчүлөргө талантын тартуулаган болсо, 12 жашында дүйнө кыдырып гастролго чыга баштаган. Ал 1996-жылы "BRIT Awards" сыйлыгынын "Мыкты аткаруучу" наамына татыган. Бул чоң сыйлыкка ал скрипкада ойногондордун алгачкысы болуп ээ болгон.

* Мындан 32 жыл мурун, 1983-жылы түрк актёру Кыванч Татлытуг Түркиянын Адана шаарында туулган. Ал Стамбулдагы Маданият университетинин коммуникация жана дизайн бөлүмүн аяктаган. 18 жашка чыкканда Кыванч моделдик бизнеске аралашып, бир жылдан кийин ал "Түркиядагы мыкты модель" ("Best Model of Turkey"), "Дүйнөлүк мыкты модель" ("Best Model of The World") деген наамдарды багындырууга жетишкен. Бул жылдары Франция, Италиянын подиумдарынын көркүн ачууга да үлгүргөн. Канчалык чоң ийгиликти жаратканы менен, Кыванч моделдик кесиптин "өмүрү" кыска экенин түшүнүп, олуттуу адистик тандоого өтөт. Ошентип, актёрдук кесипке ыктап, өзүн кино жаатында да сынап көрүүнү чечкен.
24 жашында тартылган "Кара деңиздеги америкалыктар" комедиясы ага кино дүйнөсүнө чоң эшик ачкан. Ага байма-бай сериалга тартылууга сунуштар түшүп, "Кузей-Гүней" ("Түндүк-Түштүк"), "Гүмүш" ("Күмүш"), "Тушалган махабат" сериалдарына тартылып, элдин сүймөнчүгүнө айланган.
Кыванч Татлытуг 2009-жылы "Алтын көпөлөк" сыйлыгынын "Мыкты актёр" наамын алган. Ошол эле жылы "Hurriyet" аттуу түрк гезитинин сурамжылоосу боюнча "Түркиядагы эң сексуалдуу мырза" деп табылган.