Москвада кыргыз мигранттарынан торт үчүн пара сураган полиция кызматкерлерин жумуштан кетиришти

Орусиянын Москва шаарында кыргыз мигранттарынан торт үчүн пара сураган полиция кызматкерлери жумуштан четтетилишти. Бул тууралуу бүгүн, 29-октябрда орусиялык басылмалар жазып чыгышты.

"Москвадагы Аймактар аралык тергөө башкармалыгы бул факт боюнча текшерүү иштерин жүргүзгөн. Жыйынтыгында күнөөлүү полиция кызматкерлерин жумуштан четтетүү чечими чыгарылган. Бир нече күндөн соң пара талап кылган полиция кызматкерлеринин аты-жөнү белгилүү болду, алар:  41 жаштагы Алексей Б. жана 31 жаштагы Нина Б.",- деп жазылат орусиялык басылмаларда.

Эске сала кетсек, Орусиянын Москва шаарында полиция кызматкерлери эки кыргыз мигрантынан "торт алууга 1000 рубль бер" деп талап кылганы боюнча тартылган тасма интернетке чыккан. Жашыруун тартылып алынган бул тасманы 21-октябрда Орусиянын маалымат каражаттары жарыялашкан.

Полиция кызматкерлери Москвадагы метролордун биринен Кыргыз Республикасынын эки жаранынын документтерин текшерип, алар Орусияга кирүүдө миграциялык мыйзамдарды бузганын табышып, аларды протокол толтуруу үчүн полиция имаратына алып барышкан. Алар кармалган жарандардан торт алууга деп 1000 рубль сурашкан. Мигранттар алардын айткан суммасына макул болбой, 500 рубль сунушташкан. Полиция кызматкерлери менен мигранттардын ортосундагы соодалашуу тасмага кимдер тарабынан түшүрүлгөнү белгисиз.