Чүйдө үйү өрттөнүп, апасы жана сиңдиси каза болгон кызга жаңы турак жай салынып берилди

Чүй облусунун Кара-Жыгач айылында өрттөн улам үйү күйүп, апасы жана сиңдиси каза болгон кызга жаңы турак жай салынып берилди. Бул тууралуу бүгүн, 30-октябрда Социалдык өнүгүү министрлигинин басма сөз кызматынан билдиришти.

Маалым болгондой, аталган министрлик жабыркаган кызга жөлөк пул төлөп, күйүп кеткен бардык документтерин калыбына келтирип берген. Мындан тышкары Аламүдүн районунун Социалдык өнүгүү башкармалыгы апасыз калган кызга дагы бир сиңдиси менен инисин өз камкордугуна алууга уруксат кагазын берди. Ал эми өрттөн улам толугу менен күйүп кеткен үйдүн ордуна жеке курулуш компанияларынын бири жаңы 3 бөлмөлүү турак жай салды.

Айта кетсек, былтыр 4-декабрда саат 00:28 чамасында аталган айылда 100 чарчы метрди ээлеген үй күйүп кеткен. Анын кесепетинен 41 жаштагы Эльвира Үмүтбаева жана 3 жаштагы Касиет Үмүталиева каза болуп, үй ээсинин 4 жаштагы кызы Асият Тимур кызы жана 51 жаштагы тууганы Калдар Орозбаевдин денесинин 20-30 пайызы күйгөн.