Бишкек - "Манас" аэропорту жолун оңдоодо 104 жумушчу иштеп жатат

Чүй облусуна караштуу Көк-Жар - Кой-Таш, түштүк-батыш көрүстөнү жана Бишкек шаарынан "Манас" аэропортуна барчу унаа жолдорунда курулуш иштери уланууда. Көк-Жар - Кой-Таш жолунда иштин негизги бөлүгү бүтүп, учурда Шабдан баатыр көчөсү менен Түштүк магистралдын кесилишкен жерине асфальт төшөө жүрүп жатканын 2-ноябрда Транспорт жана коммуникация министрлиги билдирди.

Аталган көрүстөнгө барчу жолдун чуңкурларын жамоо иштери бүткөнү, жакында 2,3 чакырым жерге асфальт төшөлөрү айтылды.

Аэропорт жолунун 7 - 30-чакырымдарында 104 жумушчу, 4 жүк жүктөп берүүчү техника, 13 жүк ташуучу унаа, 4 кран жана башка техникалар иштеп жатат. Эскерте кетсек, президенттин жарлыгы менен быйыл аэропортко барчу жолду капиталдык оңдоодон өткөрүүгө 1 миллиард 84 миллион 800 миң сом бөлүнгөн.