Москвада "адамдарды Сириядагы согушка жөнөткөн" деп кыргыз жараны кармалды

Москвада УКМК менен Орусиянын Федералдык коопсуздук кызматы тарабынан эл аралык террордук уюмдун мүчөсү делген кыргыз жараны кармалды. 1990-жылы туулган Кыргыз Республикасынын жараны М.М. кыргыз мамлекетине жеткирилди. Бул тууралуу 5-ноябрда УКМКнын басма сөз кызматы билдирди.

Маалыматка караганда, кармалган жаран 2014-2015-жылдары жаңы жоокерлерди азгырып жана аларды Сириядагы согуш болуп жаткан жерлерге жөнөтүү менен алектенген.

Факт боюнча "экстремисттик материалдарды сатып алуу, даярдоо, сактоо, жайылтуу, ташуу жана жиберүү, ошондой эле экстремисттик уюмдардын символдорун же атрибуттарын атайылап колдонуу”, “Кыргыз Республикасынын жарандарынын чет өлкөнүн аймагында куралдуу жаңжалдарга же согуш аракеттерине катышуусу же террордук жана экстремисттик даярдоолорду өтүүгө далалаты” беренелерине ылайык кылмыш иши козголду. Азыркы тапта тергөө амалдары жүрүүдө.