Тургуналы Нурматовдун концертинде "Кыргызымдын жигиттери" ыры эсте каларлык аткарылып, кеченин мыкты номери болууга татыды (фоторепортаж)

Бүгүн, 7-ноябрда Бишкектеги Спорт Ордосунда ырчы, композитор Тургуналы Нурматовдун "Кубанычтар дайра болуп агылып..." аттуу концерти өттү. Кеченин ээси күйөрмандарына өз ырларын аткарып берди.

Алгач "Шырылдаң", "Гүл жазым", "Эстейм, апа" аттуу белгилүү ырлары бийчилердин коштоосунда аткарылды.

Ыр кечесине келгендердин басымдуу бөлүгү улуу муундун өкүлдөрү болушту. Айрымдары балдары, неберелери менен келишти.

Т.Нурматов аккордеондун коштоосунда "Тагдыр", "Жан Чубак" аттуу ырларын жандуу ырдады.

Ар бир ыр бүткөн сайын күйөрмандар кеченин ээсине гүлдестелерди тартуулап жатышты.

"Жубайыма" аттуу ырын аткарарда Т.Нурматов сахнага жубайын чакырды.

Концертте кыргыз эстрадасынын ырчылары обондору Т.Нурматовго таандык жана өз ырларын аткарышып, кеченин ээсине куттуктоо сөздөрүн айтышты.

Өкмөттүн Талас облусундагы ыйгарым укуктуу өкүлчүлүгүнүн жетекчилиги Т.Нурматовго калпак жана чапан кийгизип, "Талас облусунун чыгаан инсаны" наамын ыйгарды.

Сулуу селкилер чыгыш бийин аткарышты.

Тургуналы Нурматовдун концертинде "Кыргызымдын жигиттери" ыры эсте каларлык аткарылып, кеченин мыкты номери болууга татыды.

Айта кетсек, Тургуналы Нурматов жакында "Супер-Инфо" гезитине маек курган.