Футбол боюнча өлкөнүн Биринчи Лигасында “Кара-Балта” конокто “Алдиерди” утуп, чемпиондук наамды камсыздады

Кечээ, 8-ноябрда футбол боюнча өлкөнүн Биринчи Лигасынын абсолюттук чемпиону аныкталды. Өзгөн районунун Куршаб айылында “Б” зонасынын чемпиону “Алдиер” өз үйүндө "А" зонасынын чемпиону "Кара-Балта" клубуна утулуп калды. Бул тууралуу КРнын Футбол Лигасынан кабарлашты.

Маалым болгондой, бул эки команда "өз үйүндө" жана "конокто" системи боюнча эки беттеш өткөрдү. Кара-Балта шаарында өткөн алгачкы беттеште 0:0 эсебиндеги тең чыгуу катталган. Жеңүүчү жооптук оюнда аныкталып, кара-балталыктар 2:0 эсебинде жеңишке жетишишти. Оюндун негизги убактысы 0:0 эсебинде аяктаган соң жеңиш голдору 102-мүнөттө жана 114-мүнөттө киргизилди. Анда Атай Жакыпбаев жана Азамат Өмүралиев айырмаланышты.

Кошумчалай кетсек, "Кара-Балта" 2-ирет катары менен Биринчи Лиганын чемпиону аталды. Өткөн жылы алар "Кара-Шоро" клубун жалпы 12:5 эсебинде утушкан.