Александр Крестинин: “Биз Австралияга каршы оюнда болгон күчүбүздү сарптайбыз”

Бүгүн, 12-ноябрда Дүйнө чемпиондугунун тандоо турунда кыргыз футболчулары Австралия курамасы менен конокто беттешет. Беттеш алдында улуттук кураманын машыктыруучусу Александр Крестининдин катышуусунда маалымат жыйыны өттү. Бул тууралуу КРнын Футбол федерациясынан кабарлашты.

Александр Крестинин журналисттер “керектүү футболчулардын” жаракат алып калганы тууралуу суроого төмөнкүчө жооп кайтарды:

– Бизде керектүү жана керексиз оюнчу деген түшүнүк жок. Улуттук курамда бардык оюнчунун өз орду, милдети бар. Бардык оюнчулар башкы курамдын оюнчулары. 16-июнда Бишкекте Австралия курамасы менен оюнда биздин команда өзүн көрсөтө алган. Оюндун айрым учурларында биздин команда мыкты болгон. Бүгүн жакшы оюн болот. Биз өзүбүздү Канберра шаарында да ишенимдүү сезип жатабыз.

– Эгер сиздердин команда утулуп калса, Дүйнө чемпиондугуна чыгуу үмүтү үзүлөбү?

– Оюнда эмне болорун көрөбүз. Кайталайм, оюн жогорку деңгээлде болот. Биз бул оюнга бар күчүбүздү сарптайбыз жана күйөрмандарды нааразы кылбайбыз.