Ошто өрттөнүп кеткен саунадан жабыркаган селкини жакындары алып кетишти. Аталган сауна 2 жыл мурун сойкукана болгону айтылды

Кечээ, 12-ноябрда Ош шаарында өрттөнүп кеткен саунадан жабыркаган 25 жаштагы селки ооруканадан качкан эмес. Бул тууралуу SUPER.KG порталына Саламаттыкты сактоо министрлигинин Ош облусу боюнча өкүлчүлүгүнөн билдиришти.
Маалым болгондой, өрттөн улам кыздын денесинин 1 пайызы күйүк алганы аныкталган. "Анын жанында документтери жок болгон. Селкини анын жакындары алып кетишкен",- дешти мекемеден.

Ош облустук милициясынан SUPER.KG'ге билдиришкендей, өрттөнгөн сауна 2-3 жыл мурун сойкукана болгон, бирок рейддер жүргүзүлүп, бул көңүл ачуучу жай жабылган. Ал эми акыркы мезгилде бул саунада сойкулар иштеген же иштебегени азырынча белгисиз экенин милициядан белгилешти.

Эскерте кетсек, кечээ, 12-ноябрь күнү эртең менен Ош шаарындагы Кулатов кичи районунда жайгашкан сауналардын биринен өрт чыккан. Андан эки кыз менен бир бала качып чыгып, кыздардын бири 1990-жылы туулган Динара Маматумарова 2-3-А даражасында колунан жана көкүрөгүнөн күйүк алып, Ош облустук күйүк борборуна жеткирилген. Учурда саунанын ээси ким экендиги такталып жатат.