Футзал боюнча улуттук курам Азия чемпиондугунун тандоо турунда Түркмөнстан менен тең эсепте ойноду

Тажикстандын Худжанд шаарында футзал боюнча 2016-жылы өтчү Азия чемпиондугунун тандоо туру өтүп жатат. Бул шаарда Кыргыз Республикасы, Түркмөнстан, Ооганстан жана Тажикстан курамалары өз ара ойноп, тайпада алдынкы 2 орунду ээлеген командалар Азия чемпиондугуна чыкмакчы.

КРнын Футбол федерациясы кабарлагандай, 14-ноябрда орун алган алгачкы беттеште кыргыз футболчулары Түркмөнстан менен беттешип, 1:1 эсебиндеги тең чыгуу катталды. 10-мүнөттө атаандаштардан Мурат Аннаев эсепти ачса, кыргыз футболчуларынан Эркин Табалдиев 20-мүнөттө эсепти теңеди. Жыйынтыгында эки команда тең бирден упайга ээ болду.

1-турда Тажикстан - Ооганстан курамаларынын ортосундагы оюнда 6:5 эсеби катталып, тажик футболчулары жеңишке жетишишти.