Базар-Коргондо кол алдындагы кызматкерге ок чыгарганы үчүн Мамлекеттик каттоо башкармалыгынын башчысы кызматынан убактылуу алынды

Мамлекеттик каттоо кызматынын Базар-Коргон району боюнча Жерге жайгаштыруу жана кыймылсыз мүлккө укуктарды каттоо башкармалыгынын башчысы Эмилбек Тарыхчиев өз колундагы кызматкерге ок чыгарганы үчүн кызматынан убактылуу алынды. Бул тууралуу бүгүн, 16-ноябрда аталган кызматтын басма сөз кызматы жарыялады.

Маалыматка ылайык, тиешелүү буйрукка Мамлекеттик каттоо кызматынын башчысы Тайырбек Сарпашев кол койду. Мындан тышкары анын тапшырмасы менен мекемеде кызматтык комиссия түзүлдү. Кызматтык иликтөөнүн жыйынтыгы боюнча Э.Тарыхчиевге карата тиешелүү чечим кабыл алынмакчы.

Эскерте кетсек, 13-ноябрда Мамлекеттик каттоо кызматынын Базар-Коргон боюнча башкармалыгынын башчысы Э.Тарыхчиев кол алдындагы кызматкерге ок чыгарган. Кызматкер башынан жаракат алып, ооруканага жаткырылган. Ал милицияга арыз менен кайрылуудан баш тарткан. Мындан улам окуя боюнча кылмыш иши козголгон эмес. Тиешелүү материалдар прокуратурага жөнөтүлгөн.