Кыргыз футболчулары Иорданияны 1:0 эсебинде утушту!

21:52. Футбол боюнча Кыргыз Республикасы - Иордания командаларынын беттеши аяктады. Кыргыз курамасы атаандашты 1:0 эсебинде утту. Жеңишти күйөрмандар зор кубануу менен тосуп алышты.

21:48. 2-таймдын негизги убактысы аяктады. Оюнга кошумча 4 мүнөт убакыт кошулду.

21:45. Кыргыз курамасынын оюнчусу Виктор Майер жаракат алып, оюндан четтетилди. Аны дарыгерлер аянттан алып кетишти. Анын ордуна оюнга Курсанбек Шератов кошулду.

21:44. Эсеп өзгөрө элек, 1:0. Улуттук курама команда алдыда. Гол киргизүүгө бир топ мүмкүнчүлүк түзүлдү, бирок жыйынтык болбой калды.

21:32. Эки командада тең айрым оюнчулар алмашышты. Кыргыз курамасында Павел Сидоренконун ордуна Фархат Мусабеков кирди.

21:21. Кыргыз курамасы улам-улам чабуул уюштуруп, атаандаштардын шаштысын кетирүүдө.

21:13. Оюн жандуу, жогорку ылдамдыкта уланууда. Биринчи голдон кийин кыргыз оюнчулары кадимкидей жандана түшүштү.

21:09. Алгачкы голдун автору Антон Землянухин жеңил жаракат алды.

21:05. Кыргыз оюнчулары 1-голду киргизишти! Голдун автору - Антон Землянухин.

21:03. Оюндун 2-таймы старт алды. "Чү" дегенде эле кыргыз оюнчулары кооптуу абал жаратышты.

20:54. Футболчулар 15 мүнөттүк эс алууда. 1-таймда чабуулчу Виталий Люкстун тепкен тобун иорданиялык коргоочулар тосуп калышты. Бул оюндагы эң кооптуу абал болду.

20:48. Беттештин 1-таймы бүттү. Эсеп 0:0.

20:46. Оюнга кошумча 2 мүнөт берилди. Күйөрмандар кыргыз командасынын ар бир чабуулун кыйкырык менен сүрөп жатышат.

20:37. Кыргыз оюнчулары кезектеги кооптуу абалды жаратышты. Аз гана тоскоолдук топтун дарбазага киришине бөгөт койду.

20:31. Кыргыз футболчулары ыкчам гол жаратуу аракетин көрүшүүдө. Алар арты-артынан бир катар чабуулдарды уюштуруп, азырынча гол жарата албай жатышат.

20:26. Кыргыз командасынын дарбазасына аз жерден гол кирип кете жаздады.

20:23. Оюн талаасында топко ээлик кылуу жана кооптуу абал жаратуу боюнча кыргыз футболчулары активдүүлүк көрсөтүшүүдө. Бир нече чабуул жасалды, азырынча эсеп 0:0.

20:15. Иорданиянын оюнчулары каршы чабуул уюштуруп, бирок гол жарата алышкан жок. Кыргыз курамасынын коргоочулары ордунда болуп чыкты.

20:07. Кыргыз курамасы биринчи жолу бурчтан топ чыгарып берүү мүмкүнчүлүгүн колдонду. Гол киргизе алышкан жок.

20:05. Күйөрмандар стадиондун 80 пайызын ээлешти. Мурунку оюндарга салыштырмалуу эл аз. Дарбазанын арт жагында да бир топ орун бош турат.

20:01. Оюн старт алды.

Стадиондо оюн алдында Парижде терактта каза тапкандарды 1 мүнөттүк эскерүү болду. Буга чейин Кыргыз Республикасы менен Иорданиянын футболчулары оюн талаасына чыгышып, өлкөлөрдүн гимни аткарылган жана кыргыз оюнчулары оюн алдында жеңил машыгуу өткөрүшкөн. Дарбазага топ тебишти, бири-бирине топ узатышты, чуркашкан.

Кыргыз футболчуларынын Иорданияга каршы беттешине карата башкы курам:
Дарбазачы: Павел Матяш.
Коргоочулар: Валерий Кичин, Тамерлан Козубаев, Виктор Майер, Азамат Байматов.
Жарым коргоочулар: Павел Сидоренко, Бактияр Дүйшөбеков, Эдгар Бернхард.
Чабуулчулар: Мирлан Мурзаев, Виталий Люкс, Антон Землянухин.