Ош облусунда түн ичинде экинчи ирет жер титирөө катталды

Улуттук илимдер академиясынын Сейсмология институтунун маалыматы боюнча, Ош облусунун Кара-Суу районунда 18-ноябрь күнү саат 02:03тө очогунда 4 баллга жеткен жер титирөө катталды. Жер титирөөнүн очогу Лангар айылынан 7 чакырым түндүк-чыгышты карай, Кара-Сөгөт айылынан 15 чакырым түштүк-чыгышты карай, Баш-Булак айылынан 15 чакырым түштүк-чыгышты карай жана Ош шаарынан 28 чакырым түштүк-чыгышты карай жайгашкан. Лангар айылында 3,8 балл, Кара-Сөгөт айылында 3,5 балл, Баш-Булак айылында 3 балл жана Ош шаарында 2-3 баллга чейин сезилген.

Өзгөчө кырдаалдар министрлигинин басма сөз кызматынан билдиришкендей, жер титирөөнүн кесепетинен Амир-Темир аймактык кеңешинин милиция бөлүмчөсүнүн имаратынын дубалдарынын кафелдери түшүп калган. Ошондой эле №52-орто мектептин, Терешкова атындагы мектеп-интернатынын дубалдарынын шыбактары көчүп, жарака кеткендиги тууралуу маалыматтар келип түштү.

Ош шаарынын Жарандык коргонуу комиссиясы тарабынан бүгүн жер титирөөнүн кесепеттерин тактоо жана жеринде иш-чараларды аткаруу жүргүзүлөт.