ӨКМ. Жер титирөөнүн кесепетинен Алай районунун айылдарындагы бир нече турак үйдө жаракалар пайда болуп, Кара-Суудагы 4-5 үйдүн дубалдары көчүп түштү

17-ноябрь күнү болгон жер титирөөдөн улам Алай районунун айылдарындагы бир нече турак үйдө жаракалар пайда болуп, Кара-Суу районундагы Чайчи айылында 4-5 турак жайдын айрым дубалдары көчүп түштү. Бул тууралуу Өзгөчө кырдаалдар министрлигинен билдиришти.

ӨКМнын Ош облустук башкармалыгынан жана Кризистик кырдаалдарда башкаруу борборунан ыкчам топ түзүлүп, бүгүн жер титирөөнүн кесепеттерин тактоо жана жеринде тийиштүү иш-чараларды уюштуруу үчүн чыгып кетти. Ошондой эле Кара-Суу райондук жарандык коргоо комиссиясы жеринде иликтөө иштерин жүргүзүүдө.

Жер титирөө Талдык, Лаглан, Тээке айылдарында 7 балл, Кызыл-Туу, Боз-Караган, Гүлчө айылдарында 6-7 балл, Ош шаарында 6 балл, Жалал-Абад шаарында 4-5 балл жана Өзгөн шаарында 5-6 балл болгон. Буга чейин ӨКМ жер титирөөнүн күчү 5-6 баллга жеткенин кабарлаган.