"Реал"-"Барселона" беттешинде күйөрмандар катуу текшерүүгө алынат

21-ноябрь күнү футбол боюнча Испания чемпиондугунун 12-турунда мадриддик "Реал" менен каталондук "Барселона" клубдары беттешет. "Сантьяго Бернабеу" стадионунда өтчү беттеш Бишкек сааты боюнча 23:15те башталат. "Эль Классико" деп аталган бул беттеш алдында коопсуздук кызматкерлери күйөрмандарды катуу текшерүүгө алып, андан кийин гана стадионго өткөрүшмөкчү. Мындай чечим жакында Париждеги стадиондогу жардыруудан кийин кабыл алынган.

Чет элдик маалымат булактары бул күнү "Барселонанын" лидери Лионель Мессинин майданга чыгарын кабарлашат. Ал сентябрь айында алган жаракатынан декабрь айынын башында айыкмак, бирок Лео мөөнөтүнөн мурун майданга чыгып, чоң жаракат алып калуу коркунучу бар экенине карабай бул оюнга чыгат. Азырынча анын 1 тайм гана ойной турганы болжонууда.

Кошумчалай кетсек, бул эки клубдун ортосундагы атаандаштыктын 100 жылга жакын тарыхы бар жана "Реал" - "Барселона" беттешин дүйнөдө эң көп күйөрман көрөрү аныкталган. Испания чемпиондугунун быйылкы сезонундагы мелдеш жадыбалына үңүлө турган болсок, 11 оюнда 27 упай топтогон "Барселона" лидерлик сапта келүүдө. Ал эми 2-орунду ээлеп келе жаткан "Реал" 11 оюнда 24 упай топтогон. Кийинки орундарды "Атлетико", "Сельта" клубдары ээлеп келүүдө.