Криштиану Роналду Ливандагы жардырууда ата-энесинен айрылган 3 жашар бала менен жолугушууга макул болду

12-ноябрда Ливанда орун алган террорчулардын жардыруусунда Хайдар Мустафа аттуу 3 жашар бала ата-энесинен айрылган. Ага коомчулуктун көңүлүн бурдуруу максатында журналисттер интернет аркылуу аны португалиялык футболчу Криштиану Роналду менен жолуктуруу аракетин көрүштү. Чет элдик маалымат булактары кабарлашкандай, жыйынтыгында футболчу жабырланган бала менен жолугушууга макул болду. Жолугушуунун качан орун алары азырынча белгисиз.

Ливандагы окуяга токтолсок, анда эл чогулган жайга жан кечтилер келип, өзүлөрүн кошо жардырып жиберишкен. Жыйынтыгында 43 адам көз жумуп, 239 адам түрдүү татаалдыктагы жаракаттарды алышкан.

Криштиану Роналду сентябрда сириялык качкындын уулун майданга жетелеп чыккан. Бул анын дарегине көп мактоо сөздөрүн алып келген.