Жылнаама, 23-ноябрь: Мындан 9 жыл мурун орусиялык тыңчы Александр Литвиненко ууландырылып өлтүрүлгөн

* Мындан 50 жыл мурун, 1965-жылы ырчы Гүлзат Байзакова Ысык-Көл облусуна караштуу Тоң районундагы Көл-Төр айылында туулган. Опера-балет театрынын алдындагы эки жылдык студияны аяктаган. "Камбаркан" ансамблинде иштеп, алгач "Жалжалым", "Чагылган" деген ырларды ырдап чыккан. Андан соң Айбек Карымов менен аткарган "Дил кайрык" ыры аркылуу элге таанылган.

* Мындан 35 жыл мурун, 1980-жылы Италиянын түштүгүн кыйраткан бир нече жер титирөөлөрдүн натыйжасында 3000 киши каза болуп, 1500 адам дайынсыз жоголуп, 8000 адам жарадар болуп, 200 000 тургун үй-жайсыз калган. Жер астында болгон силкинүүлөрдүн саны жетиге жетип, Рихтер шкаласы боюнча 6,8 баллга жеткен. Жер титирөө Неаполь менен Потенц шаарларынын ортосундагы аймакта болгон.

* Мындан 24 жыл мурун, 1991-жылы англиялык “Queen” рок-тобунун ырчысы Фредди Меркьюри өзү тууралуу айтылган ушактарды тастыктап, СПИД илдети менен ооруй турганын айтып, ошол күндүн эртеси каза болгон.
Фредди Меркьюри 1946-жылы 5-сентябрда Занзибардагы Унгуджа аралында төрөлгөн. Мектепте окуп жүргөндө фортепиано ийриминде окуган. 1958-жылы мектептеги достору менен "The Hectics" рок-тобун түзгөн.
1962-жылы үй-бүлөсү менен Англияга көчүп кетет. Ал жактан Айлсворт мектебинен живопись бөлүмүн аяктаган. 1969-жылы 13-августта ливерпулдук "Ibex" тобу менен таанышып, алар менен биргеликте концертке чыгат. Бул топ таркап, Фредди "Sour Milk Sea" тобунда ырдап, 1970-жылы "Smile" тобуна кирип, аталышын "Queen" аташат. Бул топ менен көптөгөн альбомдорду чыгарып, дүйнөгө атагы чыккан.

* Мындан 9 жыл мурун, 2006-жылы Орусия бийлигин сындагандыгы үчүн куугунтукка алынып, Британиядан саясий баш паанек тапкан Орусиянын Коопсуздук кызматынын подполковниги Александр Литвиненко уулантылып, Лондон шаарындагы ооруканада каза болгон.
Литвиненко полоний салынган чай ичкенден 3 жума өткөндөн кийин көз жумган. Ал чайды маркум Лондон мейманканаларынын биринде Луговой менен жолугушууда ичкен. Кылмышка шектүү деп ФСБнын мурдагы агенти Андрей Луговой аталган, бирок Орусия аны Британияга өткөрүп берүүдөн баш тарткан.

23-ноябрда кыргыз өлкөсүндө жана дүйнөдө орун алган окуялар тууралуу кененирээк бул жактан окуй аласыздар.