Прокуратура учак кырсыгына байланыштуу кылмыш ишин козгоду

Башкы прокуратура бүгүн, 22-ноябрда Красноярск-Ош каттамы боюнча учкан "Авиатрафик" авиакомпаниясынын Боинг 737 учагынын “Ош” аэропортунда кырсыкка кабылганына байланыштуу кылмыш ишин козгоду. Прокуратуранын маалымат кызматынан билдиришкендей, кырсык болгон жайга транспорт прокурорунун орун басары Союзбек Сыдыков жана Ош облусундагы транспорт боюнча ички иштер бөлүмүнүн жетекчилиги барган. Ал жер текшерүүгө алынып, кырсыктын келип чыгуу схемасы түзүлдү.

Алдын ала маалыматтар боюнча, “Ош” аэропортуна материалдык чыгым келтирилген. Ошондой эле экипаж мүчөсү аба коопсуздугу боюнча эрежени бузган. Прокуратура тарабынан экипаж мүчөлөрү жана жүргүнчүлөр суралышты. Транспорт прокуратурасы тарабынан КРнын Кылмыш-жаза кодексинин 280-беренеси (жол кыймылы, темир жол жана аба, сууда жүрүү боюнча эрежени бузуу) боюнча кылмыш иши козголду. Тергөө тобу түзүлүп, иликтөө иштери башталды.