Боинг 737 учагынан жабыркаган кош бойлуу аял ооруканада жатат

Бүгүн, 22-ноябрда таңкы саат 7:56 чамасында 148 жүргүнчүсү менен Орусиянын Красноярск шаарынан Ошко сапар алган "Авиатрафик" авиакомпаниясынын Боинг 737 учагы Ош аэропортуна конордо кырсыкка кабылган. Саламаттыкты сактоо министрлигинин маалыматтарына ылайык, жалпы 6 жүргүнчү Ош облустук аймактар аралык ооруканасына кайрылган. Анын төртөө ооруканага жаткырылып, экөө медициналык жардам алып үйүнө кайтышкан. Алардын арасында кош бойлуу аял да бар болгон. Ал ооруканага жаткырылып, психологиялык жардам кɵрсɵтүлгɵн. Бактыга жараша, оор жаракат алгандар жок.

Учак Орусиянын Красноярск шаарынан Ошко багыт алган, бирок аба ырайынын начардыгынан улам Бишкектеги "Манас" аэропортуна конууга аргасыз болгон. Аба ырайы жакшы делингенден кийин кайра 7:00 чамасында Ошко сапар алып, конордо тилкеден чыгып кеткен. Натыйжада учактын сол канаты жана дөңгөлөктөрү талкаланган.