Телтаевдин өлүмү боюнча №1-СИЗОнун жетекчисине кылмыш иши козголду

23-ноябрда Жазаларды аткаруу мекемелериндеги мыйзамдуулукту көзөмөлдөө боюнча прокуратура Бишкектеги №1-СИЗОнун жетекчисинин милдетин аткаруучу Б.Т.га карата "кызмат абалынан кыянаттык менен пайдалануу" беренеси боюнча кылмыш ишин козгоду. Бул тууралуу Башкы прокуратуранын басма сөз кызматынан 24-ноябрда билдиришти.

Тергөөнүн жүрүшүндө аныкталгандай, 13-ноябрда Биринчи Май райондук соту Чүйдөгү №50-СИЗОнун мурунку башчысы Иманкул Телтаевди №1-СИЗОго камакка алуу боюнча токтом чыгарган. 14-ноябрда Телтаев Бишкек ШИИББинин убактылуу кармоочу жайынан №1-СИЗОго которулган.

№1-СИЗОнун жетекчисинин милдетин аткаруучу Б.Т. Юстиция министрлигинин кылмыш-жаза аткаруу системинин тергөө изоляторлорунун ички эрежелерин бузуп, Телтаевди СИЗОнун медициналык-санитардык бөлүгүнө жайгаштыруу жөнүндө оозеки көрсөтмө берген. Ошондой эле Телтаев анда күзөтчүсү жок отурганы аныкталды.

Эскерте кетсек, Телтаев 20-ноябрь күнү №1-СИЗОнун медициналык-санитардык бөлүгүндө өз шейшеби менен асынып алган.