Өлкөнүн түштүк аймагында орун алган жер титирөөнүн күчү 4,7 баллга жетти

Бүгүн, 24-ноябрда саат 20:45 чамасында өлкөнүн түштүк аймагында кайрадан жер титиреди. Жер силкинүү тууралуу маалыматтар SUPER.KG порталына Баткен облусунун Кызыл-Кыя шаарынан, Ош облусунун Алай, Кара-Суу райондорунан жана Ош шаарынан келүүдө.

Жергиликтүү тургундар билдиришкендей, жер силкинүүнүн күчү болжол менен 3-5 баллга чейин сезилди. Азырынча кыйроолор болгону боюнча маалыматтар түшө элек.

Бүткүл дүйнөлүк жер титирөөлөрдү каттоочу борбордун маалыматына ылайык, жер титирөөнүн очогу Ош шаарынан 37 чакырым чыгыш тарапка карай, Өзгөн шаарынан 24 чакырым түштүк тарапка карай жайгашкан. Жер титирөөнүн күчү очогунда 4,7 баллга жетти.

Ал эми ӨКМнын басма сөз кызматы жер титирөөнүн очогу Кара-Суу районундагы Чайчи айылынан 5 чакырым түштүк-чыгышты карай, Алай районундагы Кабылан-Көл айылынан 7 чакырым түндүк-батышты карай, Алга-Бас айылынан 14 чакырым түндүк-чыгышты карай, Гүлчө айылынан 20 чакырым түндүк-батышты карай жана Ош шаарынан 40 чакырым түштүк-чыгышты карай жайгашканын маалымдады.

Жер титирөөнүн күчү Алай районунун Алга-Бас, Кабылан-Көл айылдарында 4,5- 5 балл, Гүлчө айылында 4 балл, Өзгөн районунун Кара-Шоро эс алуу жайында 4 балл, Кара-Суу районунун Чайчи айылында 4,5-5 балл жана Ош шаарында 3,5 баллга жетти. Алдын ала алынган маалыматтар боюнча, кыйроолор жана адам өмүрүнө зыян келтирилген жок.