Ош. Араван районунда малдарды уурдап, аларды Өзбекстандын аймагына айдап өтүп жүргөн Өзбекстандын жараны кармалды

Ош облусунун Араван районунун жашоочуларынын малдарын уурдап, аларды Өзбекстандын аймагына айдап өтүп жүргөн Өзбекстандын жараны кармалды. Бул тууралуу Ош облустук ички иштер башкармалыгынан кабарлашты.

Маалыматка ылайык, кылмышка шектүү катары Өзбекстандын жараны, Анжиян облусунун Мархамат районунун 1990-жылы туулган тургуну С.Сардор кармалды. Ал Мурадыл, Дилмурат, Акыл жана Исраил аттуу балдар менен биргеликте Араван районунун жашоочуларынын короолорундагы малдарды уурдап, уурдалган малдарды Өзбекстанга айдап өтүп жүрүшкөндөрүн айткан. Учурда тергөө иштери жана калган кылмышка шектүүлөрдү жоопко тартуу боюнча кошуна мамлекеттин укук коргоо органдары менен сүйлөшүүлөр жүрүп жатат.

Кылмышка шектүүлөр төмөндөгү жарандардын малдарын уурдап ири өлчөмдөгү зыяндарды келтиришкен:

1. 2015-жылдын 17-март күнү Араван районунун Төө-Моюн айыл аймагынын Керкиден айылынын тургунунун мал сарайынан 8 баш ири мүйүздүү малын;
2. 2015-жылдын 16-17-апрель күндөрү ошол эле айылдын тургуну М.Бнын мал сарайынан 4 малын торпогу менен;
3. 2015-жылдын 30-апрель күнү Төө-Моюн айыл аймагынын Найман айылынын тургуну Г.Инин 2 баш малын;
4. 2015-жылдын 2-3-май күндөрү ошол айылдын тургуну М.Мнын короосунан 5 баш малын;
5. 2015-жылдын 22-23-октябрь күндөрү Төө-Моюн айыл аймагынын Керкиден айылынын тургуну А.Жнын короосунан 3 баш малын уурдашкан.
   
   Жалпысынан Араван районунун тургундарына 1 миллион 130 миң сомдук чыгым келтиришкен. Аталган фактылар боюнча кылмыш иши козголуп, тергөө иштери улантылууда.