Орусия менен Түркиянын ортосундагы мамиле спорт тармагына да кедергисин тийгизүүсү мүмкүн

"Спорт саясатка аралашпайт" деп көпчүлүк ишенгени менен, кызуу талкуу жаратып жаткан Орусия менен Түркиянын ортосундагы мамиле спорт тармагына да өз кедергисин тийгизиши мүмкүн. Мындай божомолду бир катар орусиялык басылмалар талкууга алып жатышат.

Маалыматка таянсак, "Рио-де-Жанейро-2016" Олимпиадасына жолдомо ойнотула турган бир катар мелдештер Түркияда өтөт. Түркия бокс, күрөш, ок атуу, волейбол, стол тенниси, дзюдо сыяктуу спорт түрлөрү боюнча Олимпиадага жолдомо ойнотулуучу мелдештерди өткөрөт. "Саясий абал курчуй берсе, орусиялык спортчулар Түркиядагы мелдештерге катышпайт" деген пикирлер айтылууда.

Ошондой эле футбол боюнча Европанын Лигасы жана Чемпиондор Лигасында да бул маселелер каралышы мүмкүн. Себеби чуулардын алдын алуу үчүн уюштуруучу уюмдар саясий көз караштары дал келбеген, салкын саясий мамиледеги өлкөлөрдүн клубдарын башка-башка тайпаларга бөлүп келишет. Мисалы, азыр аталган лигаларда уюштуруучулар мүмкүн болушунча Орусия менен Украинанын клубдарын ойнотпоого аракет кылышат.

Кошумчалай кетсек, Түркия менен Сирия чектешкен аймакта Орусиянын Су-24 аскердик учагы аба мейкиндигин бузганы үчүн атылган. Бул окуядан кийин Орусиянын президенти Владимир Путин Түркия тарапты айыптап, бул көрүнүштүн аягы оор кесепеттерге алып келүүсү мүмкүн экенин айткан.