Ференц Пушкаш атындагы “Эң кооз гол” сыйлыгына талапкер 3 гол иргелип алынды

Эл аралык футбол федерациясы (ФИФА) кечээ, 30-ноябрда Ференц Пушкаштын атын алып жүргөн “Эң кооз гол” сыйлыгына талапкер 3 голду тандап алды. Мыкты голдорду тизмектөөдө 2014-жылдын 27-сентябрынан 2015-жылдын 23-сентябрына чейинки аралыкта киргизилген голдор каралган. Кеңейтилген 10 голдун ичинен добуш берүүнүн жыйынтыгында 3 гол сыйлыкка көрсөтүлдү. Бул тууралуу аталган уюмдун расмий сайты кабарлайт.

Маалыматка ылайык, кыскартылган тизмеге Алессандро Флоренци ("Рома"), Уэнделла Лира ("Гоянезия") жана Лионель Мессинин ("Барселона") голдору кирди. Сыйлык ээси 2016-жылы 11-январда Цюрихте өтө турган салтанаттуу иш-чарада аныкталып, сыйланат.

Кошумчалай кетсек, өткөн жылы сыйлыкты колумбиялык футболчу Хамес Родригес (сүрөттө) Дүйнө чемпиондугунда Уругвайдын дарбазасына киргизген голу үчүн алган.