Кыргыз жеринде кезектеги жер титирөө катталды

Бүгүн, 1-декабрда Кыргыз Республикасынын аймагында кезектеги жер титирөө орун алды. Жер силкинүүнүн сааты жана кайсы аймактарда орун алганы учурда такталууда. Сейсмология институтунан SUPER.KG порталына кабарлашкандай, учурда так маалыматтар алынып жатат. "Белгилей кетчү жагдай, жер титирөөнүн күчү дээрлик катуу болду. Бактыга жараша, зыян тарткандар, кыйроолор болгон жок",- дешти.

Жер титирөөлөр боюнча иштеген дүйнөлүк борбордун маалыматына ылайык, бул жер титирөөнүн күчү 5,2 баллга жеткен. Очогу Жалал-Абад шаарынан 53 чакырым түндүк-чыгышты карай, Бишкек шаарынан 200 чакырым түштүк-батышты карай жайгашкан.

Өзгөчө кырдаалдар министрлигинин маалыматына ылайык, жер титирөө саат 12:13тө катталып, очогу Жазы-Кечүү айылынан 7 чакырым чыгышты карай, Кызыл-Үңкүр айылынан 16 чакырым түштүк-чыгышты карай, Арсланбап айылынан 30 чакырым чыгышты карай, Жалал-Абад шаарынан 52 чакырым түндүк-чыгышты карай жайгашкан. Базар-Коргон районунун Жазы-Кечүү, Ак-Булак, Кызыл-Үңкүр айылдарында 5,5 балл, Кара-Алма, Ак-Алма айылдарында 5 балл, Арсланбап айылында 4,5 балл, Сузак районунун Орток, Саты айылдарында 5 балл, Көк-Жаңгак шаарында 4 балл, Кара-Көл шаарында 4 балл, Жалал-Абад шаарында 3,5 балл, Токтогул шаарында 3,5, Ош шаарында 3 баллга сезилди.