Ошто туура эмес токтотулган унаа чуулуу МАИ кызматкери Адахам Арабаевдики экендиги белгилүү болду

Ош шаарында жөө жүрүүчү өтүүчү жолду тосуп токтотулган автоунаа Ош шаардык ички иштер башкармалыгынын алдындагы милициянын атайын жол-кайгуул ротасынын командиринин орун басары Адахам Арабаевдики экендиги белгилүү болду. Муну SUPER.KG`ге укук коргоо органдарындагы жеке булактар тастыкташты.

Опель автоунаасы шаардын Зайнабединов жана Масалиев көчөлөрүнүн кесилишине туура эмес токтотулганын, анын айынан "зебрадан" адамдардын өтүшүнө тоскоолдук жаралганын бүгүн, 4-декабрда эртең менен окурман "ЭЛДИК КАБАР" аркылуу жарыялаган.
Аталган МАИ кызматкери буга чейин бир катар чуулуу иштерге аралашкан. Ага мурда "ээлеген кызматына толук татыктуу эмес" деген эскертүү берилген. Быйыл августта Ош шаарында орун алган МАИ кызматкерлеринин чырында да Арабаевдин аты аталып, кызматтык иликтөөдөн кийин ал тартиптик жазага тартылган.

Ош шаардык жол-кайгуул кызматы Арабаевди атайын каралоо аракети жүрүп жатканын айтууда.