Ноокат районунун акими: “Ден соолугунун мүмкүнчүлүгү чектелгендерге транспорт каттамдары акысыз болот”

Ден соолугунун мүмкүнчүлүгү чектелген адамдарга Ноокат райондук транспорт каттамдары акысыз болорун райондун акими Бекболот Айтиев билдирди. Муну райондук администрациядан кабарлашты.

Маалым болгондой, кечээ, 3-декабрь - Эл аралык ден соолугунун мүмкүнчүлүгү чектелген адамдарды коргоо күнүнө карата Ноокат райондук администрациясы, Социалдык өнүктүрүү башкармалыгы, Ноокат райондор аралык медико-социалдык эксперт комиссиясы, "Жаш ниет" жаштар коомдук бирикмеси тарабынан иш-чара уюштурулду.

Ага Ноокат райондук мамлекеттик администрациясынын резервдик фондунан акчалай каражат бөлүнүп, ден соолугунун мүмкүнчүлүгү чектелген жарандарга жана дүлөйлөр коомуна акчалай көмөк көрсөтүлдү. Ноокат району боюнча жалпы 6300дөй ден соолугунун мүмкүнчүлүгү чектелген адамдар бар, алардын 2470и тубаса болуп эсептелет.