Өлкө чемпиону "Алай" футболдук клубу Азия Футбол конфедерациясынын Азия Кубогуна даярдык көрүү үчүн каражат издеп жатат

Өлкө чемпиону "Алай" футболдук клубу Азия Футбол конфедерациясынын Азия Кубогуна даярдык көрүү үчүн каражат издеп жатат. Бул тууралуу SUPER.KG порталына команданын медиа-офицери Кубанычбек Ураимов билдирди.

Анын айтымында, команда Түркияда машыгуу сборун өткөрүүнү пландап жатат. Клуб учурда сборго коротулчу каражатты төлөп берчү демөөрчүлөрдү издөөдө. "Стадионду оңдоп-түзөөдөн өткөрүү тууралуу азырынча сөз боло элек",- дейт К.Ураимов.

Кошумчалай кетсек, Азиянын Футбол конфедерациясы мелдешке катышуу үчүн Кыргыз Республикасынан "Алай" клубун жана "Алга" клубун чакырган. "Алайлыктар" макулдук беришсе, "Алга" каржы маселесине байланыштуу баш тарткан.

"Алай" тандоо туру аркылуу мелдешке жолдомо алмакчы. 11-декабрда Малайзияда өтчү чүчү кулак таштоо аземинде тандоо турундагы атаандаштар белгилүү болот жана катышуучу командалар тайпаларга бөлүнөт.