“Хизбут-Тахрир” уюмунун мүчөлөрүнө колдо жасалган жардыруучу түзүлмөлөрдүн курамчаларын алганга жана даярдаганга жардам берген жаран кармалды

УКМК “Хизбут-Тахрир” диний-экстремисттик уюмунун 1969-жылы Нарын облусунда туулган жигердүү мүчөсү Б.Жуматаевди колго түшүрдү. УКМКнын маалымат кызматынан 7-декабрда билдиришкендей, Жуматаев мурда экстремисттик идеологияны таркаткандыгы үчүн 4 жылга жатак-абактарда жаза өтөө менен соттолгон.

Иликтөө иштеринде анын диний-экстремисттик уюмдун мүчөсү болуп туруп өзүнүн кылмыштуулук ишмердигин улантканы жана террористтик топтордун мүчөлөрүнө колдо жасалган жардыруучу түзүлмөлөрдүн курамчаларын алганга жана даярдаганга көмөк көрсөткөнү аныкталды.

Б.Жуматаевдин жашаган жерине тинтүү жүргүзүүдө диний мазмундагы ар түрдүү басылмалар жана электрондук алып жүрүүчүлөр табылып, процессуалдык түрдө алынды. Алынган материалдар тиешелүү экспертизага жөнөтүлдү.

Бул факт боюнча КРнын Кылмыш-жаза кодексинин 241-беренеси боюнча кылмыш иши козголду. Азыркы маалда Жуматаев шектелген адам катары кармалып, УКМКнын убактылуу кармоочу жайына киргизилди. Тергөө жүрүп жатат.