"Гүлчөдө асынган абалда табылган аскер үй-бүлөлүк кырдаалга байланыштуу өз өмүрүнө кол салган" дейт Башкы штабдын өкүлү

Бүгүн, 8-декабрда “Кыргыз армиясындагы реформанын бүгүнкү күндөгү жүрүшү” аттуу тегерек столдун жүрүшүндө Башкы штабдын өкүлү Бакыт Жапаров Гүлчөдө асынган абалда табылган аскердин өлүмү тууралуу айтып өттү.

“Маалымат чыккандан кийин эле алдын ала божомолдорду айтуу туура эмес. Гүлчөдөгү өз өмүрүнө кол салган аскер боюнча иликтөө жүрүп жатат. Алдын ала маалыматтар боюнча, анын өлүмү үй-бүлөлүк кырдаалга байланыштуу болгон. Аскердин апасы анын акча которула турган банк картасын өзүнө алып алган жана акчасын да өзү алып турган. Апасы учурда "дооматым жок" деп жазып берди. Иликтөө бүткөндөн кийин гана жыйынтык чыгат”,- деди Жапаров.

Эске салсак, 1-декабрда Гүлчө айылында 24 жаштагы аскер кызматкери асынган абалда табылган. Алай райондук аскер комиссариаты аны 2014-жылдын жазгы чакырылышында кабыл алган. Ал аскер кызматын келишимдик негизде өтөп жүрчү. Бүгүнкү күндө Ош прокуратурасы кызматтык иликтөө иштерин жүргүзүүдө.