Ош. "Унаалардын терезелерин талкалап, ири суммадагы акча каражаттарын уурдаган" деп шектелген 2 жаран колго түштү

"Унаалардын терезелерин талкалап, ири суммадагы акча каражаттарын уурдаган" деп шектелген 2 жаран колго түштү. Бул тууралуу Ош шаардык жана облустук ички иштер башкармалыгынан кабарлашты.

Маалыматка ылайык, шектүү катары Талас облусунун тургундары 1975-жылы туулган Д.Ж. менен 1984-жылы туулган Б.М. кармалып, убактылуу кармоочу жайга киргизилишти. Уурулук фактысы боюнча кылмыш иши козголуп, иликтөө жүрүүдө.

Иликтөө иштеринин жүрүшүндө төмөнкү фактылар аныкталды:

4-ноябрда Ош шаарында Тойота Сурф унаасынын терезеси талкаланып, 1800 доллар жана 15 миң сом салынган баштык уурдалган;

12-ноябрда Кара-Суу районунда Лексус GX-470 үлгүсүндөгү унаанын терезеси талкаланып, 1 миллион сом өлчөмүндөгү каражат уурдалган;

11-ноябрда Ош шаарында Лексус GX-470 үлгүсүндөгү унаанын терезеси талкаланып, 10 миң сом өлчөмүндөгү каражат жоголгон;

8-сентябрда Кара-Суу районунда Хундай-Портер унаасынын терезеси талкаланып, унаанын ичинен 3400 доллар жана 2 миң сом уурдалган.