№50-СИЗОдон качкандардын арасынан жалгыз тирүү кармалган Эдил Абдрахмановдун дарылануусун эл аралык уюм төлөп берет

№50-СИЗОдон качкандардын арасынан жалгыз тирүү кармалган Эдил Абдрахмановдун бутуна жасалуучу операциянын чыгымдарын Кызыл Крест Эл аралык комитети төлөп берет. Бул тууралуу бүгүн, 9-декабрда ЖАМКтын басма сөз кызматы билдирди.

Маалыматка ылайык, өмүр бою эркинен ажыратылган Абдрахманов учурда №47-колониянын ооруканасында жатат. "Октон улам анын санынын сөөгү сынган. Аны караган дарыгер көп каражат талап кылуучу операция керек экенин айткан. Мындан улам Жаза аткаруу кызматы Кызыл Крест Эл аралык комитетине кайрылган. Бул уюмдун башчысы Стефан Жакье Абдрахмановдун абалы менен таанышкан соң, операциянын чыгымдарын төлөп берүүгө макулдугун билдирген",- деп жазылат маалыматта.

Эскерте кетсек, түрмөдөн качуу болгондон 10 күн өткөндө, 22-октябрда Чүй облусунун Аламүдүн районундагы Ала-Тоо айыл аймагынан Эдил Абдрахманов тирүү кармалган.