Футбол боюнча 2016-жылкы Европа чемпиондугуна катышчу 24 команда 6 тайпага бөлүндү. Учурдагы чемпион Испания тайпада Чехия, Түркия жана Хорватия менен ойнойт

12-декабрда Париж шаарында (Франция) 2016-жылы өтчү футбол боюнча Европа чемпиондугунун финалдык баскычына чыккан командаларды тайпаларга бөлүштүрүү иш-чарасы өттү. Чүчү кулактын жыйынтыгында мелдешке жолдомо алган 24 команда төрт-төрттөн 6 тайпага бөлүштүрүлдү.

Мелдештин расмий сайты кабарлагандай, үй ээси Франция курамасы "А" тайпасына түштү. Тайпалык баскычта франциялык футболчулар Румыния, Албания жана Швейцария курамалары менен беттешет. Ал эми учурдагы Европа чемпиону Испания курамасы "D" тайпасында Чехия, Түркия жана Хорватия курамалары менен ойнойт.

Мелдешке катыша турган 24 команда тайпаларга төмөнкүдөй тартипте бөлүндү:

"А"тайпасы "В" тайпасы С тайпасы Франция Англия Германия Румыния Орусия Украина Албания Уэльс Польша Швейцария Словакия Түндүк Ирландия "D" тайпасы "E" тайпасы "F" тайпасы Испания Бельгия Португалия Чехия Италия Исландия Түркия Ирландия Австрия Хорватия Швеция Венгрия

Кошумчалай кетсек, "Евро-2016га" тандоо турунун жыйынтыгында 23 команда жана үй ээси Франция жолдомо алган. Биринчи ирет 24 команданын катышуусунда өтчү мелдеш Франциянын 10 шаарында 10-июндан 10-июлга чейинки аралыкта өтөт.